Komunikadu ImprensaPeriode: Setembru 2011Edisaun: 29 Setembru, 2011
Tribunál Distritál Dili hala’o audiénsia julgamentu hodi lee leitura desizaun ba kazu violénsia doméstika ho Nú. prosesu 62/C.ord/TDD/2011. Kazu ne’e komete husi kondenadu Sebastião dos Santos hasoru lezada OM iha Distritu Ermera, iha loron 06, Dezembru 2009.Julgamentu ho agenda lee leitura desizaun ne’e deriji husi Juiz singular Dra. Rosa Brandão (Juiza Internasional), husi parte Minístériu Públiku reprezenta husi Dra. Remizia de Fatima da Silva no husi parte defeza, reprezenta husi Dr. Denis Lacerda (Defensoria Públiku Internasionál), husi Eskritoriu Defensoria Públika. Diretór JSMP Luis de Oliveira Sampaio haktuir katak” mesmu pena ne’ebé mak hamonu ba arguidu seidauk adekuadu, maibé JSMP espera katak pena ne`ebé kondenadu hetan pelumenus bele eduka kondenadu hodi labele repete tan ninia hahalok ne`e iha futuru nomós sai ezemplu ba komunidade seluk, hodi kumpri provizaun Lei Kontra Violénsia Doméstika ne`ebé defini krime violénsia doméstika hanesan aktu krime ho natureza hanesan krime públiku. Iha audiénsia lee leitura desizaun ne`ebé mak lee husi juiza Rosa Brandão, hamonu pena fulan rua prizaun, maibé suspende ba tinan ida. Tuir tribunál nia avaliasaun ba prosesu tomak konklui katak kondenadu provadu komete krime ofensas korporais simples hasoru ninia kónjuje. Tribunál mós deklara katak kazu ne`ebé mak kondenadu komete, priense rekizitus ne`ebé mak define iha artigu 145 Kódigu Penál ne`ebé dehan katak se maka ofende ema seluk nia isin ka saúde sei hetan pena prizaun too tinan 3 ka multa. Faktus provadu sira ne`ebé deskobre durante audiénsia julgamento iha tribunál hatudu katak, iha loron 06 fulan Dezembru tinan 2009, kondenadu ne’ebé mak nu’udar lezada nia kaben, haksesuk malu ho lezada tanbá osan folin husi karau ida ne`ebé sei deve hela ba lezada, tanbá ne’e kondenadu buti ninia kakorok no riba nia ba rai, tanbá hahalok ne`e lezada hetan metan iha ninia kakorok no ninia liman. Bázeia ba monitorizasaun JSMP nota katak tribunál esplika ba kondenadu katak iha Timór Léste hahalok hanesan ne`e sempre akontese tanbá iha oportunidade, no iha tinan 2010 ita iha ona Lei Kontra Violénsia Doméstika, no husu ba kondenadu atu labele komete tan krime hanesan nomós krime seluk durante tempo suspensaun. tanbá Kuandu kondenadu repete tan sei kumpri pena ne`ebé mak tribunál hamonu ona ba nia durante fulan rua iha komarka. Atu hetan informasaun kle’an, favor kontaktu: Luis de Oliveria Sampaio
Diretór ezekutivu JSMP
Email: luis@jsmp.minihub.org
Landline: +670 3323883
